Abatwara amakamyo bazagira uruhare muri gahunda ya Intango y'Ubudaheranwa yatangijwe na IBUKA Rwanda

Mu gihe u Rwanda n'Isi muri rusange bitegura kwibuka Jenoside yakorewe Abatutsi mu 1994 ku nshuro ya 31.

Umuryango IBUKA ku rwego rw'igihugu watangije gahunda yitwa '"Survivors in the Community Initiative - Intango y’Ubudaheranwa!'"

Umuhango wo gutangiza ku mugaragaro gahunda ya INTANGO Y'UBUDAHERANWA wabereye mu Ntara y'amajyepfo mu karere ka Nyaruguru Umurenge wa Ngera.

Mu bikorwa byaranze gutangiza ku mugaragaro iyi gahunda  harimo kugabira Inka, Ubwisungane mu kwivuza bwa Mutuelle de sante, gutangira kubaka inzu izashyikirizwa utishoboye warokotse Jenoside yakorewe Abatutsi mu 1994 ndetse himurwa imibiri y'abazize Jenoside yakorewe Abatutsi mu 1994 kugirango iruhukire mu rwibutso rumeze neza.

Intango y'Ubudaheranwa ni gahunda igamije kurushaho kwegera no gutera ingabo mu bitugu abarokotse Jenoside yakorewe Abatutsi mu 1994 mu buryo bwo kububakira ubushobozi no kubafasha gutera intambwe mu kwiteza imbere.

Abashoferi batwara amakamyo bakomeje ubufatanye na IBUKA nkuko biyemeje kugira igikorwa bakora buri mwaka, ni muri urwo rwego no  muri iyi gahunda bazagira uruhare muri ibyo bikorwa. Ni nyuma kandi yuko  abatwara amakamyo bubakiye inzu utishoboye warokotse Jenoside yakorewe Abatutsi mu 1994 mu mujyi wa Kigali, Akarere ka Kicukiro mu murenge wa Gikondo, mu gihe cyo kwibuka Jenoside yakorewe Abatutsi mu 1994 ku nshuro ya 30.

Iyi gahunda ya Intango y'Ubudaheranwa kandi ikazagera mu gihugu hose uko ubushobozi burushaho kuboneka IBUKA ikazagera ku bagenerwa bikorwa batandukanye.

Mu gutangiza gahunda ya Intango y'ubudaheranwa abayobozi bakuru mu nzego z'igihugu bari bahari barimo umuyobozi wa IBUKA ku rwego rw'igihugu, inzego z'umutekano na Minisitiri w'ubutegetsi bw'igihigu Hon Patrice MUGENZI.

Ni gahunda itangijwe mu gihe u Rwanda ruri kwitegura Kwibuka Jenoside yakorewe Abatutsi mu 1994  ku nshuro ya 31 mu minsi 100 izatangira kuwa 07 Mata 2025.