Inzu yarenga miriyoni 12 yashyikirijwe KABAGANWA Marthe nabatwara amakamyo.

Sendika y’abashoferi batwara imodoka nini zambukiranya imipaka n'izikorera imbere mu gihugu (ACPLRWA) yatashye inzu yubakiye utishoboye warokotse Genocide yakorewe Abatutsi muri 1994,

Ni igikorwa cyabereye aho iyo nzu yubatse mu Kagari ka Kanserege, umurenge wa Gikondo, Akarere ka Kicukiro, aho uwo mubyeyi wubakiwe yari asanzwe atuye.

 Uyu mubyeyi KABAGANWA Marthe yafashijwe naba bashoferi  batwara amakamyo biyemeje kujya baremera abatishoboye.

Iki gikorwa rero kikaba cyaragizwemo uruhare n'abashoferi batandukanye ari ababarizwa muri ACPLRWA  ndetse n’abandi batayibarizwamo babashije gukusanya ubushobozi kugirango bakore icyo gikorwa cyagutse nk’uko byagarutsweho n’umuyobozi wa ACPLRWA Bwana Justin KANYAGISAKA.

Mu kiganiro n’abanyamakuru yatangaje ko iki ari kimwe  mu bikorwa bakora buri mwaka  harimo kuremera abarokotse Genocide ari nabwo buryo bahisemo kubakira uyu mubyeyi, ndetse hari n’ibindi bikorwa bakora kubufatanye n’inzego zibanze.

KANYAGISAKA Justin yagarutse ku rugendo rwo kuzamura iyo nyubako, aho ari igikorwa batangiriye hasi bakaba baratangiranye no gusiza ikibanza kugeza igihe bashinze inzu yewe irasakarwa kugeza ubwo  igera ku musozo  ishyizwemo n'amakaro.

Bimwe mu byo  abashoferi batwara amakamyo bagenda bakora harimo kuremera abatishoboye bakabona uko biyubakira ubuzima n'ibindi. 

Si ubwa mbere abatwara amakamyo bakoze ibikorwa nkibi kuko batangiriye mu karere ka Ngoma, intara y’iburasirazuba bakaba bakomeje uko biyemeje kubikora buri mwaka. Ibyo byose kandi babigeraho ku bufatanye n’inzego bwite za Leta  nk'uko byagarutsweho na bamwe mu bashoferi bitabiriye uwo muhango.

Umubyeyi wubakiwe ubana n'abana be babiri babahungu, yabwiye itangazamakuru ko yishimye cyane muri we ndetse aboneraho no gushimira  cyane aba bashoferi  bose bagize uruhare mu kumukura mu bwigunge ndetse ashimira ubuyobozi bwakomeje kumuba hafi.

Ni igikorwa cyatashywe ku mugaragaro cyitabirwa n'abarimo uhagarariye IBUKA mu karere ka Kicukiro ari nawe wari umushyitsi mukuru, Umunyamabanga nshingwabikorwa w’umurenge wa GIKONDO iyi nzu iherereyemo, n'uharariye IBUKA mu murenge  wa Gikondo.

Umuyobozi wa ACPLRWA yavuze ko nka Sendika bashimira abafatanyabikorwa bose babafashije kugira ngo icyo gikorwa kigende neza anashimira abashoferi muri rusange bagize uruhare rukomeye mu kubaka inzu yatashywe.

Inzu yashyikirijwe KABAGANWA Marthe igizwe n'ibyumba bitatu n’uruganiriro, ikaba ifite intebe zigezweho, ikagira igikoni, ubwiherero ndetse n'ubwogero, ikaba irangiye yose itwaye amafaranga y’u Rwanda arenga miriyoni 12.