Mu gikorwa ngaruka mwaka, kuwa 28 Kamena 2025 Abatwara amakamyo basuye Urwibutso rwa Nyamata

Kuri uyu wa gatandatu tariki 28 kamena 2025, Abashoferi batwara amakamyo yambukiranya imipaka ndetse n'akorera imbere mu gihugu bahuriye mu gikorwa cyo kwibuka ku nshuro ya 31 Jenoside yakorewe Abatutsi  muri 1994.

Ni igikorwa cyari kiyobowe na sendika ya ACPLRWA ibarizwamo abo bashoferi batwara imodoka nini zambukiranya imipaka n'izikorera imbere mu gihugu, aho basuye bakanunamira abaruhukiye mu Rwibutso rwa NYAMATA ruherereye mu karere ka Bugesera.

Aba bashoferi b'amakamyo bari biganjemo abanyarwanda ariko harimo n'abakomoka mu bihugu bitandukanye birimo UGANDA, KENYA ndetse na TANZANIA.

Abatwara amakamyo bari barangajwe imbere na Perezida wa ACPLRWA bwana Justin KANYAGISAKA, basobanuriwe amateka yaranze ibihe bya Jenoside yakorewe Abatutsi muri Bugesera dore ko Urwibutso rwa Nyamata rwahoze ari Kiliziya ikicirwamo abari bayihungiyemo bizeye kuharokokera ariko bikanga bakahicirwa.

Abashoferi batemberejwe ibice bigize Urwibutso rwa Nyamata banerekwa ibimenyetso bikibitswe  n’Urwibutso byafashije abo bashoferi  kurushaho gusobanukirwa ubukana Jenoside yakoranywe.

Abashoferi basobanuriwe ko mbere  yuko Jenoside itangira, abari Abatutsi babanje kujyanwa gutuzwa muri Bugesera kugirango bizorohe mu kubatsemba ndetse aka gace kari kazwiho kugira isazi ya Tsetse kuburyo uwo irumye agenda apfa gahoro gahoro.

Nyuma yo gufata umunota wo kwibuka no gushyira indabo ku mva iruhukiyemo imibiri y'abazize Jenoside yakorewe Abatutsi, hakurikiyeho kumva ubuhamya bw'uwarokokeye mu karere ka Bugesera.

TUZINDE Narcise wigeze no kuba Perezida wa ACPLRWA yatanze ubuhamya ku nzira y'umusaraba banyuzemo, by'umwihariko Urwibutso rwa NYAMATA rukaba ruruhukiyemo abana be bane ndetse n'uwari umufasha we.

TUZINDE Narcisse

Mu buhamya bwe yagarutse ku nzira itoroshye ndetse n'amateka yatumye abura umubyeyi we(Papa) ku myaka ye 6 y'amavuko gusa, ariko ashima Imana ko umubyeyi wabo umwe bari basigaranye yabarwaniye ishyaka bagakura ndetse anashima aho igihugu kigeze kiyubaka.

TUZINDE Narcisse yakomeje ashimira ubuyobozi bwiza n'imbaraga bashyira  mu kurandura ingengabitekerezo ya Jenoside, ubu abanyarwanda bakaba barabaye umwe iby’amoko bitakibaho.

TUZINDE Narcisse yibukije abatwara amakamyo bitabiriye uwo muhango ko nta mushoferi ugira ubwoko kuko iyo umwe akoze impanuka atamenya uri bumugereho mbere  akamutabara, bityo ko abashoferi bose baba abanyarwanda, abagande, abatanzaniya ndetse n'abandi bose  ari bamwe kuko  umwuga wabo utagira umupaka.

KANYAGISAKA Justin Perezida wa ACPLRWA

KANYAGISAKA Justin uyobora ACPLRWA mu butumwa bwe yagize ati ‘’na twe nk'abashoferi mu byo dushyize imbere ni ukurandura ingengabitekerezo ya Jenoside ndetse no guhangana na ba bandi bagoreka amateka bakayavuga uko atari, ni muri urwo rwego nk’abashoferi batwara imodoka zambukiranya imipaka buri mwaka tugomba kujya tuzirikana gahunda yo Kwibuka twifatanya n’abanyarwanda muri rusange bidufasha gusobanukirwa ibyabaye kugirango bitazongera kubaho ukundi’’.

IRAMBONA Jonas avuga ko abakuru ndetse n'ababyeyi bakwiye kujya bafata umwanya bakigisha abana babo n'abakiri bato amateka nyayo y'ibyabaye.

Jonas kandi avugako nk'abashoferi bazarushaho kuba ba Ambasaderi muri bagenzi babo bityo bakarandura Ingengabitekerezo ya Jenoside cyane ko mu bihugu banyuramo ikihagaragara.

IRAMBONA Jonas Umushoferi utwara Ikamyo.

NYIRIBAKWE Jean Paul ushinzwe abafatanyabikorwa muri IBUKA Rwanda wari Umushyitsi mukuru muri uyu muhango, yashimye uruhare rw'abakora umwuga wo gutwara amakamyo muri gahunda zo kwibuka no kwita ku barokotse, aho bamaze gukora ibikorwa binyuranye bijyanye no gufasha abarokotse Jenoside yakorewe Abatutsi muri 1994 nko kububakira amazu ndetse abandi bakabafasha gusana izo barimo.

Uyu muyobozi bwana Jean Paul NYIRIBAKWE yakomeje agaragaza ko ari ikimenyetso kiza cyo gufasha ndetse no gukura mu bwigunge abarotse kandi nabo bashimira abatwara amakamyo bakomeje kubitaho.

Yashimiye byimazeyo aba bashoferi kubwo kwigomwa bakaza kugira ibyo basobanukirwa muri urwo rugendo bakoze ndetse anabwira abashoferi b'abanyamahanga bari aho kuba abambere mu gusobanurira bagenzi babo ibyabaye mu Rwanda kuko bo babisobanuriwe.

Abanyamuryango ba ACPLRWA bashimiye FPR Inkotanyi ndetse n'ingabo zari iza RPA zabohoye igihugu zikanahagarika Jenoside, ndetse bavugako ibyo babonye bibahumuye kuko babyumvaga batarahagera ngo bamenye mu by'ukuri uko Jenoside yateguwe ikanashyirwa mu bikorwa.

Urwibutso rwa NYAMATA abashoferi basuye ruruhukiyemo imibiri y'abarenga  ibihumbi mirongo ine na bitanu (45,000) biciwe muri Bugesera, muri bo abarenga ibihumbi 10,000 bakaba baraguye kuri iyo Kiliziya