Undi mushoferi w'ikamyo aherutse guhitanwa n'impanuka yabereye MASAKA - UGANDA.

Ahagana ku gicamunsi cyo ku wa 04 Mutarama 2025, nibwo hamenyekanye iby'urupfu rwa Siradji HAGUMA wari umushoferi utwara ikamyo mu kigo cy'ubwikorezi cya KESI Investment LTD.

Ni impanuka yatewe no kugongwa n'imodoka yo mubwoko bwa Fuso yari ihetse imbaho bivugwa ko yataye igice cyayo cy'umuhanda ikagonga iyo Siradji yari atwaye, imbaho zikagwira Cabine y'ikamyo bikaviramo Siradji guhita yitaba ?mana. Iyi mpanuka yabereye Masaka mu gihugu cya Uganda ku isaha ya saa munani (14:00)

Ni impanuka yabaye mu gihe abashoferi muri rusange bari bari mu myiteguro yo gushyingura mugenzi wabo BIZIMUNGU Tarcisse n'ubundi nawe uherutse kwitaba imana azize ibikomere byatewe n'impanuka yagiriye mu gihugu cya Tanzania ariko we ntiyahise yitaba Imana impanuka ikiba,  kuko yabanje kujya muri Coma avurirwa mu bitaro bya Kanombe.

Mu mashusho yagiye ahagaragara ubwo impanuka yahitanye Siradji HAGUMA yamaraga kuba, humvikanye abatabaraga bavuga ko bari kugerageza gukuraho imbaho zari zagwiriye Cabine y'ikamyo yarimo kuko zari nyinshi ariko byarangiye n'ubundi basanze y'amaze kwitaba Imana.

Bamwe mu bashoferi twabashije kuganira nabo, bavuga ko izi mpanuka zikomeje kwiyongera umunsi ku wundi, bemeza ko kimwe mubikomeje kuzongera, aruko usanga umushoferi akora amasaha y'ikirenga kandi ntabone uburyo buhagije bwo kuruhuka, abandi nabo bagaruka ku mihanda mibi bagendamo mu bihugu banyuramo mu ngendo zabo za buri munsi.

Ibi byose babigarukaho nka bimwe mu bikomeje kongera umubare w'abashoferi baburira ubuzima mu kazi kabo ka buri munsi.

Urupfu rwa Siradji HAGUMA rwashenguye benshi kuko atari n'impanuka we ubwe yari yagizemo uruhare ahubwo yagonzwe asanzwe no mu gisate cye.

Mu gihe kitageze ku cyumweru kimwe abatwara amakamyo bemeza ko ari igihombo gikomeye gutakaza abashoferi babiri kandi bose  bagiye bagifite imbaraga zo gukorera imiryango yabo.